Қарағанды облысы Бұқар жырау ауданына қарасты Төрткүл ауылының тұрғындары жылқылардың жаппай қырылып жатқанына алаңдаулы, деп хабарлайды inbusiness.kz сайты Patriotkaragandy Instagram-парақшасына сілтеме жасап.
Малдың аяғы іріңдеп, жаралар бүкіл денеге тарап, ауырып өледі екен. Сарапшылар бұл қандай дерт екенін анықтай алар емес.
"Комиссия келіп, жылқылардың қандай инфекция жұқтырғанын анықтау үшін талдаулар жасады. Талдау бойынша бұл лимфангит емес. Бірақ мұны лимфангит деп санаймыз. Неге? Өйткені өткен жылдың мамыр айынан бері Үміткер деген көрші ауылда лимфангит болды”, – деді шаруа қожалығының басшысы Мәдениет Жұмаділдә.
Айтуынша, сол жердің малы Үміткер ауылының малдарымен бірге жайылады, өйткені олардың жайылымдық жерлері ортақ.
"Біздің ауылдың жылқылары көрші ауылдың жылқыларынан жұқтырған шығар. Ол жерде лимфангит ауруы расталып, ауыл тұрғындарына өтемақы төленді. Ал шенеуніктер бізге мал шығынына өтемақы төлегісі келмей отырған сияқты. Сондықтан лимфангитті мойындамай, басқа ауру деп отыр. Бірақ біз оның белгілерін көріп отырмыз, аяғынан бастап басына дейін іріңді жаралар шыққан. Бұдан жылқы өледі", – деді шаруа қожалығының басшысы.
"Бұқаржырау ауданының ветеринарлық станциясы" мемлекеттік кәсіпорнының мамандары лимфангиттің расталмағанын айтты.
"Төрткөл ауылындағы жылқылардың өлгенін білеміз. Шығын болып жатқанын түсінеміз, жылқылар өліп жатыр. Біз екі рет анализ тапсырдық, бірақ инфекциялық лимфангит расталмады. Төрткөл ауылының малдары басқа малмен жайылып жүрсе, не бопты? Бұл – басты критерий емес. Өткен күні қайтадан сынамалар алынды, олар қайтадан ветеринарлық зертханаға және ғылыми-зерттеу институтына жіберілді. Қазір нәтижесін күтіп отырмыз", – деді ветеринарлық станция.
Жылқы еті мен қымыз сатып аларда ветеринарлық сертификатты тексеруді ұсынады, өйткені ауру малдың етін сататындар болуы мүмкін.
