Қарағандыда 35 жас полицей ант қабылдады. Олармен бірге он офицерге арнай атақ берілді, деп хабарлайды әкімнің баспасөз қызметі.
Іс-шараны Қарағанды облысы ПД бастығының бірінші орынбасары полковник Құрманғали Ысмағұлов ашты. Ол жас әріптестерін құттықтап, Отанға адал қызмет етіп, үлгі тұтар тәртіп сақшылары болатынына сенім білдірді.
"Полициядағы қызмет – бұл заңға және адамдарға деген терең құрметке негізделген, үлкен шыдамдылық пен азаматтық борышты, адалдық пен әділдікті талап ететін қиын жұмыс. Сіздердің борыштарыңыз – қоғам тарапынан көрсетілетін құрметке сай қызметтік міндеттерді абыроймен орындау және Қазақстан Республикасының азаматы мен патриоты құрметті атағына ие болу", –деді ол.
Іс-шарада жедел әрекет ету арнайы жасағы жауынгерлері өнер көрсетті. Олар өздерінің кәсіби-жауынгерлік дағдыларын паш етті. Сондай-ақ, қонақтардың назарына облыстық полиция департаменті кинологиялық қызмет орталығының қызметтік иттері көмегімен қылмыскерлерді ұстау үлгілері ұсынылды.
