Қарағандыда бүгінде177 мың автомобиль мен мотоцикл тіркелген. Олардың басым бөлігі азаматтардың меншігінде (154 мың), деп мәлім етті облыс әкімінің баспасөз қызметі.
"Қауіпсіздікке әсер ететін маңызды фактор транзит көліктер үшін Орталық – Оңтүстік бағытында айналма жолдың болмауы. "ҚазАвтоЖол" АҚ жалпы құны 48 млрд теңгені құрайтын ұзындығы 49 км қаланы Солтүстік-шығыстан айналып өту жолын қайта жөндеу мен салу бойынша жобалау-сметалық құжаттама әзірледі. Бұл қаланың көше-жол желісіне түсетін жүктемені азайтуға мүмкіндік береді. Бірақ қаржыландырудың болмауына байланысты жобаны іске асыру кейінге қалдырылды", – деді Қарағанды облысы әкімінің орынбасары Сәбит Оспанов қалалық мәслихаттың сессиясында.
Оның айтуынша, қала әкімдігі қаржы бөлу қажеттілігі туралы хатты премьер-министрге жолдады. Әкімнің орынбасары депутаттардан үкіметке тиісті өтініш жолдауларын сұрады.
Қаладағы апаттылық жоғары болып қалуда.
Полицияның мәліметінше, 2016 жылы Қарағандыда 4000 аса ЖКО орын алды, соның ішінде 257-сінде адамдар құрбан болған және зардап шеккен.
38 адам жол апатының салдарынан көз жұмды, 262-сі түрлі жарақаттар алған.
2017 жылдың екі айында 12 ЖКО тіркелді, соның салдарынан 14 адам зардап шеккен.
