Қарағандыдағы Балқаш көшесінде автосервиске бейімделіп жасалған екі қабатты гараждан өрт шықты. Түскі сағат 14:39-да шақыртуды қабылдаған өрт сөндірушілер оқиға орнына бес минутта барған. Өрт сөндіру бөлімі жеткен кезде екі қабатты гараж, шаруашылық құрылыстарының ағаш конструкциялары жанып жатқан. Сондай-ақ гараждың төбесі жанып, ортасына құлап түскеннен кейін өрт көршілес орналасқан жер үйді шарпыған. Құтқарушылар жер үйге жеткен өртті әрі қарай жібермей сөндіріп алды. Тілсіз жау лапылдап тұрған кезде өрт сөндірушілер гараждан бір автокөлікті алып шыққан. Ал осы гаражда 10 автокөлік пен бір мотоцикл жанып кеткен.
"Өрт туралы уақытылы хабарламаудың салдарынан от жалындап күшейіп кеткен . Өрт сөндіру бөлімшелерінің үйлесімді іс-қимылдары нәтижесінде отты одан әрі таратуға жол берілген жоқ . Тілсіз жаудың шығу себептері анықталуда", – деп мәлімдеді Төтенше жағдайлар департаментінің ресми өкілі Жанна Дәуренбекова.
Өртті он техникамен 55 құтқарушы сөндірген. Тілсіз жау 200 шаршы метр жерді жалмаған.
Бүгінде келген шығын мен өрттің шығу себептері анықталып жатыр.
Арайлым Еркебаева
