Қарағанды полицейлері өзінің екі жасар қызын кепілге алған 34 жастағы ер адамды ұстады, деп хабарлайды Sputnik Қазақстан.
Қарағанды облыстық полиция департаменті баспасөз қызметінің ақпаратынша, кеше сағат 15:20-да "102" телефонына 34 жастағы ер адамның туған қызын кепілге алғаны туралы ақпарат түскен.
Оқиға орнына барлық жедел қызмет жұмылдырылды. Полицейлер ер адаммен төрт сағат бойы келіссөз жүргізген. Нәтижесінде 2 жасар қыз аман-есен құтқарылды.
"Ұсталған ер адам полицияға жеткізілді. Арнайы операция кезінде ешкім жапа шеккен жоқ", – делінген хабарламада.
Ер адамның неге мұндай қадамға барғанын тергеу анықтайды.
Бұл факті бойынша Қылмыстық кодекстің 261-бабы 2-тармағына сәйкес сотқа дейінгі тергеу амалдары басталды. Басқа ақпарат ҚПК 201-бабына сәйкес жарияланбайды.
