Кеше, 1 қазан күні Қарағандыда Шахтер даңғылында кәріз құбырын ауыстыру кезінде мердігер компанияның екі жұмысшысы қаза тапты, деп хабарлайды inbusiness.kz сайты.
Қарағанды облыстық полиция департаменті Қазақстан Республикасы Қылмыстық кодексінің 277-бабының 3-бөлігі – "Абайсызда екі адамның өліміне әкеп соқтырған тау-кен жұмыстарын немесе құрылыс жұмыстарын жүргізу кезінде қауіпсіздік ережелерін бұзу" бойынша қылмыстық іс қозғалғанын хабарлады.
"Қарағанды Су" компаниясы түсініктемесінде жұмыстарды мердігер ұйым – ТОО "НС Система" жүргізгенін айтты.
"1 қазанда учаскеде жер қазу барысында мердігер ұйымның екі қызметкері қаза тапты. Қазіргі таңда оқиғаның мән-жайын полиция анықтап жатыр", – делінген ресми хабарламада.
Компания өкілдері қаза болғандарды жерлеу шығынын "НС Система" басшылығы өз мойнына алатынын да атап өтті.
