Қарағандыда алдағы демалыс күні, 26 тамызда Tamyz Race – 2018 кросс-кантри веложарысы өтеді. Оған қызығушылық танытқан әуесқой спортшылар қатыса алады, деп хабарлайды өңір әкімінің баспасөз қызметі.
Жарыс Қарағанды - Астана тасжолының Луначарский көшесінің қиылысындағы тоғайда өтеді. Шара 9:00-де басталып, 13:00-де аяқталады деп жоспарлануда. Оған әуесқой спортшылар ғана қатыса алады. Ал кәсіби велошабандоздарға трассаны конкурстан тыс бағындыруға рұқсат етіледі.
Қатысуға өтініштер бірнеше санат бойынша қабылданады: 16 жастан 35 жасқа дейін және 36 жастан жоғары ерлер. Әйелдер 16 жастан 35 жасқа дейін және 36 жастан жоғары. Ерлер үшін төрт шақырымнан 3 айналым, ал әйелдер екі айналым жүріп өту керек.
Барлық қатысушылар өздерімен бірге қорғаныш бас киімі мен екі дөңгелегінде де тоқтату жүйесі бар жарысқа жарамды велосипед ала келу керек.
