Өйткені заңсыз салынған. Ал, мердігер компания "төленген қаражат үлескерлерге қайтарылмайды" деп отыр, деп хабарлайды Inbusiness.kz сайты.
Енді бір жыл бұрын 50 пайыз төлем жасаған 1500 үлескердің күні не болмақ? Заңсыз құрылыс жайында билік өкілдері білген бе?
Сәуле Әбеуова осыдан бір жыл бұрын әл-Фараби тұрғын үй кешенінен 3 бөлмелі пәтер алып, төлемнің жартысын мердігерге беріп брондық келісім шарт жасасқан. Алайда, содан бері пәтерінің құжатын қолға түсіре алмай отыр. Ол аз болғандай үйді сүру туралы кеше ғана шыққан соттың шешімі уайымды үдете түскен.
"Осы пәтерге 14 млн салдым. Оған қоса 10 млн-ға жөндеу жүргіздім. Адамдар қазір тұрып жатыр. Олар ешқайда кетпейді. Біз ақымақ емеспіз ғой. Сату бөлімі ашық тұрды. Бәрі сатып жатыр. Ешкім ештене демеді. ГАСК қайда болды сол кезде?", - дейді үлескер Сәуле Әбеуова.
Сәуле сынды сот шешімімен келіспеген 293 пәтердің тұрғыны әл-Фараби кешенінің алдында жиналды. Олар мұндай жағдайға жетуімізге қадағалау жүргізбеген мемлекеттік органдар кінәлі дейді.
"Бұл не әдет! Халықтың не жазығы бар? Сатты үйді. Басында келіспесе бар емес пе биліктер. Тоқтатып тастамай ма? Мен қайда барамын енді?", - дейді үлескер Қайрат Нұрболатов.
Далада қалуға шақ қалған 1500 тұрғын мәселені білуге келген мәжіліс депутаты мен билік өкілдеріне бас салды.
Тұрғынның мұнша ашынуына негіз де бар. Себебі, құрылысты құжатсыз салған компания өкілдері алған ақшалар тұрғындарға қайтарылмайтыны ашық айтып отыр.
"Бүгінде ақшаны қайтару болмайды. Себебі, басшылық барлық қаржыны жұмсап жіберді. Сондықтан, үлескерлерге ақша қайтарылмайды. Соттың шешіміне қатысты аппеляциялық шағым береміз", - дейді құрылыс компаниясының директоры Абылайхан Әмірбеков.
Ал, Қарағанды қаласының шенділері де соттың мұндай шешім шығаратынын күтпеген ұқсайды. Арнайы органдармен ақылдасамыз деп халыққа басу айтты.
"Әкім де айтты. Қала әкімі. Міне 3-4 күн біз алдық. Қазір арнайы органдармен жұмыс істейміз. Ақылдасамыз. Сосын жұма күні әкімдікте кешке кездесеміз де сосын нақтысын айтамын. Әл-Фараби болсын, Нұра болсын, Хан болсын осылай осылай шешілетін болады. Күтейік. Екі үш күн бізге керек", - дейді Қарағанды қаласы әкімінің орынбасары Қайрат Камзин.
Айта кетейік, өнеркәсіп және құрылыс министрлігiнің мәліметінше, соңғы үш жыл ішінде елімізде заңсыз құрылыс жүргізген 309 компания әкімшілік жазаға тартылған. Оның 109-ы 2023 жылы тіркелген. Қазіргі таңда тек Қарағанды қаласының өзінде құжатсыз салынған 3 тұрғын үй кешенінің ісі сотта қаралып жатыр.
