5 мамырда Қарағанды қаласының Оңтүстік-Шығыс ауданында орналасқан несие беру ұйымына кешкі сағат 18.00 де екі азамат кіріп келіп ақша беруді талап еткен. Олар 30 жастағы менеджер азаматшаны тапаншаға ұқсас затпен қорқытып, 1 миллион 29 мың теңгені алып кеткен.
Аталған дерекке байланысты Қазақстан Республикасы Қылмыстық кодексінің 192 бабы 2 тармағына сәйкес қылмыстық іс тіркелді. Күдіктілер Астана қаласында қолға түскен.
-Ауыр қылмысты ашу мақсатында, департаменттің криминалдық полиция басқармасы, Қарағанды қалалық Полиция басқармасы және оның аумақтық полиция бөлімдерінің тәжірибелі қызметкерлерінен жедел-іздестіру тобы құрылды. 7 мамыр күні жүргізілген кешенді іс-шаралар барысында Астана қаласынан осы іске қатысы бар деген күдікпен 23 және 25 жастағы екі азамат анықталып ұсталды. Айғақ заттар тәркіленді, -деп хабарлады Қарағанды облыстық ПД бастығының орынбасары Әбіл Әбілдин.
Күдіктілер уақытша ұстау изоляторына қамалды. Қылмыстық кодекстің санкциясына сәйкес ұсталғандарға бес жылдан он жылға дейін бас бостандығынан айырылу жазасы көзделген.
