ҚР Ішкі істер министрі Ерлан Тұрғымбаев Нұр-Сұлтан мен Алматы қалаларына кіріп-шығу тәртібін түсіндірді, деп хабарлайды ҚазАқпарат.
"Денсаулық сақтау органдары мен Қорғаныс министрлігі блокпосттар арқылы Нұр-Сұлтан мен Алматы қалаларының периметрі бойынша көлік құралдарының кіруі мен шығуын және азаматтардың қозғалысын шектейді. Қалаға Нұр-Сұлтан мен Алматыда тиісті тіркеуде тұрған адамдар және қалалардың өмірлік қызметтерін қамтамасыз етуге қажет адамдар ғана кіреді. Тізімді әкімдіктер анықтайды", – деді министр "Хабар 24" телеарнасындағы үндеуде.
Оның айтуынша, бұл тыйым тұтыну тауарларын жеткізетін көліктерге жүрмейді.
Сондай-ақ, министр жалған ақпарат таратқандарға жауапкершілік жүктелетінін ескертті және азаматтардан карантин кезінде түсіністік танытуға шақырды.
Бұған дейін ведомство басшысы 8 мыңнан астам полицейдің қоғамдық тәртіпті сақтауға шығарылғанын, оларға еңбек демалысын беруге, қызмет бабынан тыс сапарлауға тыйым салынғанын хабарлаған еді.
