Сирияның Идлиб провинциясындағы Сармада қалашығында қару-жарақ қоймасы жарылып, 36 адам қаза тапты. Оның ішінде 12 бала бар. Тағы 40-тан астам адам жарақат алды, деп хабарлайды 24.kz.
Қойма көпқабатты үйдің бірінші қабатында орналасқан екен. Бірақ күшті жарылыстан ғимараттың түгі қалмай қирады. Әзірге жарылыстың неден болғаны белгісіз.
Ақпарат құралдарының хабарлауынша, қойма болған үйде көптеген адам тұрып жатқан. Қазір апат болған жерде іздестіру-құтқару жұмыстары жүріп жатыр. Өйткені үйінді астында тағы адамдар болуы мүмкін.
Айта кетсек, Идлиб аймағында биыл көктемде 7 қабатты үйде жарылыс болып, 28 адам көз жұмған еді. Жалпы Сирияның солтүстік-батысындағы бұл аймақ үкіметке қарсы соғысып жатқан оппозициялық күштер ең көп шоғырланған аймақ болып саналады.
