"Бір апта ішінде 3 267 қылмыс тіркелді. Оның 2 201-і бір тәулік ішінде ашылды. Полиция қызметкерлері ізін суытпай 8 кісі өлтіру қылмысын, соңы өлімге әкеп соққан 4 қасақана ауыр зиян келтіруді, 2 қарақшылықты, 25 тонау фактісін және 504 өзгенің мүлкін ұрлау қылмысын әшкереледі", – деді Нұрділдә Ораз ішкі істер министрлігінің онлайн брифингінде.
Бұдан кейін ол министрлік "Қару" жедел алдын алу шарасын ұйымдастырғанын баяндады.
"Жедел алдын алу іс-шарасы кезінде полиция органдары заңсыз айналымнан 328-ден астам атыс қаруын тәркіледі. Оның ішінде 212 дана тегіс ұңғылы қару, 38 дана газды қару, 9 қолдан жасалған қару, 27 травматикалық қару, 18 электрлік қару алынды. Қаруды заңсыз сақтағаны және алып жүргені үшін ҚР ҚК 287-бабы бойынша 134 материал тіркелді", – деді ішкі істер министрінің кеңесшісі.
Оның сөзінше, қаруды заңсыз сақтағаны және алып жүргені үшін 195 азамат әкімшілік құқық бұзу кодексінің 482-бабы бойынша әкімшілік жауапкершілікке тартылды.
"994 заңды тұлға тексерілді. Оның ішінде қару-жарақ саудасына маманданған 72 дүкен, 9 782 фермерлік және шаруа қожалығы және 84 490 азаматтық қару иесі тексерілді. Нәтижесінде 3 196 тәртіп бұзу фактісі анықталды. Оның 2 404-і қаруды сақтау және алып жүру ережесін бұзған. 792 азамат қаруды тіркеу және қайта тіркеу тәртібін сақтамаған. Олар осы үшін жауапкершілікке тартылды", – деді Нұрділдә Ораз.
Қанат Махамбет
