"Әрбір әскери қызметші нормативтерді орындау, сынақтар мен тест тапсыру қорытындылары бойынша өзінің кәсібилігі негізінде бағаланады. Бөлімшелердің жауынгерлік қабілеттілігі мен үйлесімділігі, командирлердің жеке құрамды басқара білуі есептік кезеңде өткізілген оқу-жаттығулардың нәтижелері бойынша бағаланатын болады", – деп жазылған таратылған хабарламада.
Жеке құрамды ауыстыру үшін арнайы операциялар барысында әскери-көлік авиациясын пайдалануды жетілдіру жолдары белгіленген. Қазіргі уақытта тікұшақтардан ғана емес, Қазақстан армиясының қару-жарақ құрамындағы Си-295 ұшақтарынан да парашютпен десант түсіруге мүмкіндік беретін шаралар қабылдау тапсырылды.
Сондай-ақ полигондарда атыс пен оқу-жаттығуларды өткізу кезінде әскери қызметшілер мен халықтың қауіпсіздігін қамтамасыз ету бойынша қосымша шараларды енгізу жөнінде нұсқау берілді. "Қоршау мен бақылаушыларды шығарумен қатар, ұшқышсыз ұшу аппараттарын пайдалана отырып, оқу-жаттығу алаңдары мен іргелес аумақтарды шолу мен бақылау жүргізу, ал мәліметтерді нақты уақытында атыс пен оқу-жаттығу басшылығына шаралар қабылдау үшін беру жоспарлануда".
