Бұл туралы Премьер-Министрдің орынбасары – Қаржы министрі Ерұлан Жамаубаев Үкімет отырысында айтты, деп хабарлайды inbusiness.kz сайты.
"Республикалық бюджет бойынша, сомасы 20 трлн теңгеге шығыстар жүргізілді. Атқарылмау 336 млрд теңгені құраса, оның ішінде үнемдеу – 29 млрд теңге. Игерілмегені – 307 млрд теңге. Игерілмеудің неғұрлым ірі сомалары ішкі істер, өнеркәсіп және құрылыс, төтенше жағдайлар және мәдениет және ақпарат министрлігі министрліктерінде қалыптасты", - деді ведомство басшысы.
Министрдің дерегінше, игерілмеудің негізгі себептеріне өнім берушілердің тауарларды уақтылы жеткізбеуі, конкурстық рәсімдерді дер кезінде өткізбеуі, қосымша келісімдерді жасасу рәсімдерін ұзақ жүргізу жатады.
Бұдан басқа, жергілікті бюджеттердің шығындары 12 трлн теңгені құраған.
"Атқарылмағаны – 531 млрд теңге. Биыл өңірлерге 2 трлн теңгеге жуық нысаналы трансферттер көзделген. Оларға 1 желтоқсанға 1 трлн 752 млрд теңге бөлінген. Оның 89,8%-ы игерілген. Атқарылмағаны – 179 млрд теңге, оның ішінде 3 млрд теңге – үнемдеу, 176 млрд теңге игерілмеген", - деп атап өтті Қаржы министрі Ерұлан Жамаубаев.
Айта кетсек, ең көп игерілмеу Астана қаласы, Маңғыстау, Атырау және Батыс-Қазақстан облыстарында қалыптасқан.
