Қаржы министрі Мәди Такиев 2023 жылғы республикалық бюджеттің атқарылуы туралы Үкіметтің есебіне қатысты Жоғары аудиторлық палатаның қорытындысы бойынша түсінік берді, деп хабарлайды inbusiness.kz сайты.
"Атап айтқанда, мемлекеттік жоспарлау жүйесінде, бюджеттің кіріс бөлігінің орындалуы мен мемлекеттік қаражаттың пайдаланылу тиімділігінде бірқатар мәселелер атап өтіледі. Біріншіден, Палатаның әкімшілендіруді күшейту туралы, көлеңкелі экономиканы қысқарту туралы, салық рәсімдерін жеңілдету және т.б. туралы ұсынымдарына қатысты. Өткен жылы Көлеңкелі экономикаға қарсы іс-қимыл жөніндегі іс-шаралардың 2023-2025 жылдарға арналған кешенді жоспары қабылданды. Көзделген шараларды іске асыру, 2022 жылы көлеңкелі экономика деңгейін жоспарланған 19,9%-дың жалпы ішкі өнімге 18,8%-ға дейін төмендетуге мүмкіндік берді", - деді Мәди Такиев.
Сөзінше, атқарушы билік салық және кеден заңнамасын жетілдіру, сондай-ақ оларды әкімшілендіру бойынша белсенді жұмыс жүргізіп жатыр.
"Осыған байланысты барлық процесті ауқымды цифрландыру мәселелеріне басымдық береміз. Қолма-қол ақшасыз төлемдердің көлемін ұлғайту бойынша жүргізіліп жатқан жұмыс көлеңкелі айналымның қысқаруына үлкен әсер етеді. 2023 жылдың қорытындысы бойынша бұл көрсеткіш 88,7% құрады", - деді ведомство басшысы.
