Қазақстандық банктер кез келген қауіп-қатерге дайын. Бұл туралы Қаржы нарығын реттеу агенттігі мәлімдеді, деп хабарлайды inbusiness.kz тілшісі.
Реттеуші орган банк секторына стресс-тесті жүргізіп, Қаржы институттарының әр түрлі сынаққа төзімділігін тексерген. Сонымен, санкция қыспаққа алып, инфляция үдеп, жаһандық экономикалық дағдарыс болса, банктеріміз тұралап қалмай ма?
Стресс-сынаққа банк секторының 70 пайызын құрайтын 10 ірі банк қатысқан. Нәтижеге сүйенсек, қатты дағдарыс болған жағдайда капиталдың жеткілікті мөлшерінің көрсеткіші 17 пайыздан 13 пайызға түскен. Десе де, реттеуші нормаға сай екенін растап отыр. Агенттік өкілінің айтуынша, қиын сценарий өрбіген күннің өзінде, банктердің капиталы тұрақты, нормативті 5,5 пайыздық талаптан жоғары.
