2022 жылғы қаңтар-маусымда Қазақстан қор биржасында (KASE) корпоративтік облигациялар бойынша сауда-саттық көлемі 702,5 млрд теңгені құрады, бұл 2021 жылғы қаңтар-маусыммен салыстырғанда 14,9%-ға аз.
Бұл KASE алаңында өткен брифинг барысында белгілі болды, деп хабарлайды inbusiness.kz.
Сауда-саттықтың орташа күндік көлемі 6 млрд теңгені, қайталама нарықта – 4,9 млрд теңгені, мәмілелердің орташа күндік саны – 64, қайталама нарықта – 61, бір мәміленің орташа көлемі 92,3 млн теңгені, ал қайталама нарыққа – 71,1 млн теңге құрады.
2022 жылдың бірінші жартыжылдығында KASE-де жалпы сомасы 129,6 млрд теңгеге 10 эмитенттің барлығы 16 облигация шығарылымы орналастырылды, бұл өткен жылдың сәйкес көрсеткішінен 72,2%-ға төмен.
Облигациялардың қайталама нарығында сауда көлемі 59,7%-ға өсіп, 573 млрд теңгені құрады.
2022 жылдың алты айының қорытындысы бойынша биржада саудаланған корпоративтік қарыз көлемі 0,9%-ға немесе 143,1 млрд теңгеге азайып, 15,3 трлн теңгеге дейін төмендеді.
2022 жылғы 1 шілдедегі жағдай бойынша KASE сауда тізімдерінде 82 эмитенттің корпоративтік облигацияларының 324 шығарылымы болды.
Құралай Құдайберген
