Білім және ғылым вице-министрі Шолпан Каринова осылай мәлімдеді, деп хабарлайды inbusiness.kz.
Шолпан Каринованың баяндауынша, мектептерге музыка, көркем еңбек, информатика, құқық негіздері, графика және жобалау, кәсіпкерлік және бизнес негіздері сынды пәндерді қашықтан өткізу мүмкіндігі беріледі.
"Орын тапшылығына байланысты 300-ден аса мектепте жағдай қиынырақ болуы мүмкін. Мұндай мектептерде оқушылардың 19%-ы немесе 680 мыңға жуық бала оқиды. Бұл мектептер қосымша шаралар арқылы, оның ішінде кейбір пәндерді қашықтан оқи отырып, икемді кесте бойынша штаттық түрде жұмыс істейді", – деді вице-министр.
Оның айтуынша, ата-аналардың өтініші бойынша созылмалы ауруы бар балаларға медициналық ұйымның анықтамасы негізінде қашықтан оқыту ұсынылды.
"Қашықтан оқыған оқушылар оқулықпен, оқыту контенті бар ақпараттық жүйемен, электронды журналмен қамтылады. Тоқсандық жиынтық бағалауды мектепте тапсырады", – деді Шолпан Каринова.
Қанат Махамбет
