Бизнес иелері 1 мың 680 теңгелік сары майды 2 мың 690, ал 45 теңге тұратын тұзды 75 теңгеге сатқан. Сүт пен тауық етінің құнын, тіптен, 60% көтеріпті. Заңсыздықты әкімдік жанынан құрылған арнайы комиссия анықтады. Бас-аяғы 5 кәсіпкер жәй ғана ескертумен құтылған. Қазір тауар құнын 15 пайызға дейін түсіру бойынша жұмысты қолға алған көрінеді. Саудамен нәпақа тауып отырғандар ырыққа көнбесе 1 млн теңгеге дейін айыппұл төлейді. Айта кетейік, азық-түлік бағасын бақылайтын бұл комиссия өткен жылы құрылған. Құрамында 14 мемлекеттік және мемлекеттік емес ұйым өкілдері бар.
"Егерде бұл кәсіпкерлер 15 пайыздан асыратын болса, әлеуметтік тауарларға, заң аясында 10 мрп-дан, яғни 35 мың теңгеден, ірі кәсіпкер болса 1 млн теңгеге дейін айыппұл төлейді. Әрине бұл құқықбұзушылық анықталған жағдайда. Осындай бұзушылықтарды жібермеу үшін, түсіндіру жұмыстары жүргізіп жатыр", дейді Облыстық кәсіпкерлік және индустриялық-инновациялық даму басқармасының басшысы Нұрбол Жаңабеков.
