Ішкі істер министрлігі қылмыстық-атқару жүйесі комитеті төрағасының орынбасары Есқали Саламатов кәсіпкерлерге колониялардан өндіріс алаңдарын ұсынды.
Оның мәлімдеуінше, ауданы 390 мың шаршы метрді құрайтын колонияның
40%-ы бос тұр.
"Кәсіпкерлерді 110 мың шаршы метр аумақта сотталғандардың күшімен бизнес бастауға шақырамыз. Бас бостандығынан айырылған адамдарды жұмыспен қамтып, оларға лайықты еңбекақы төлейтін кәсіпкерлермен келісімге келуге әзірміз", – деді комитет төрағасының орынбасары.
Есқали Саламатов кәсіпкерлерге жан-жақты қолдау көрсетуге уәде берді.
"Алдағы уақытта қылмыстық-атқару жүйесі комитеті жанынан кәсіпкерлер құқығын қорғау кеңесін құрамыз. Аталмыш кеңес кәсіпкерлерді жан-жақты қолдау көрсетеді", – деді ол.
Оның дерегінше, бүгінге дейін ел аумағындағы 300 кәсіпкер 3 мыңнан астам сотталушыны жұмысқа қабылдаған.
Қанат Махамбет
