ҚР Еңбек және халықты әлеуметтік қорғау вице-министрі Олжас Ордабаев кәсіпкерлік мақсатта 400 АЕК көлеміндегі мемлекеттік қайтарымсыз гранттар беру мәселесіне тоқталды, деп жазады inbusiness.kz.
Вице-министр кәсіпкерлікті дамыту жөніндегі 2021-2025 жылдарға арналған ұлттық жоба аясында ұсынылатын 400 АЕК мөлшерінде мемлекеттік грант алу мүмкіндігі туралы айтты.
"Business.enbek.kz порталында 2023 жылғы 20 ақпаннан бастап жаңа бизнес-идеяларды іске асыру үшін мемлекеттік гранттар алуға бірінші ағын бойынша өтінімдерді қабылдау басталады. Республика бойынша бірінші ағын шеңберінде 2,5 мың грант беру жоспарланып отыр. Биыл барлығы 4 ағын болады, оның шеңберінде 9 мың грант беріледі", – деді Олжас Ордабаев журналистермен "галстуксіз" кездесу барысында.
Тіркелген жұмыссыздар мен тіркеу мерзімі 3 жылға дейінгі жеке кәсіпкерлер мемлекеттік грант алуға үміткер бола алады:
- мүгедектігі бар адамдар;
- "қандас" мәртебесі бар адамдар;
- өңіраралық қоныс аударушылар;
- аз қамтылған отбасылардың мүшелері;
- көп балалы отбасының мүшесі (жұбайы/зайыбы);
- мүгедектігі бар баланы тәрбиелеп отырған адам (жұбайы/зайыбы);
- асыраушысынан айрылу бойынша жәрдемақы алушылар.
Үміткердің соңғы 3 жыл ішінде "Бастау Бизнес" жобасы аясында кәсіпкерлік негіздері курсын аяқтағаны туралы сертификаты болуы тиіс.
