ҚР Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров "Каспий" футбол клубының бұрынғы директорын тергеуге қатысты жаңа деректерді айтты, деп хабарлайды inbusiness.kz сайты.
– Маңғыстау облысы бойынша Сыбайлас жемқорлыққа қарсы қызмет "Каспий" футбол клубы" ШЖҚ МКК бұрынғы директоры мен деструктивті діни орта өкілдеріне қатысты сотқа дейінгі тергеу жүргізуде. Олар зорлық-зомбылықты қолдана отырып, аса ірі мөлшерде ақша бопсалады деген күдікке ілінді. Маңғыстау облысы прокуратурасының үйлестіруімен үш күдікті ҚПК-нің 128-бабы негізінде ұсталып, уақытша ұстау изоляторына қамалды, – деді ол.
Ресми өкілдің айтуынша, қазіргі уақытта бұрынғы директордың оқу-жаттығу жиындарын ұйымдастыру үшін футбол клубына бөлінген бюджет қаражатын жымқыру фактілеріне қатысы бар-жоғы тексерілуде.
