Каспий теңізінің жағалауында 150-ден астам итбалықтың өлексесі табылды. Бұл туралы блогер Азамат Сәрсенбаев айтты, деп хабарлайды inbusiness.kz сайты.
"Дауылдан кейін Түпқараған ауданындағы Баутино маңында Қызыл кітапқа енген жүздеген итбалықтың денесі жағалауға шығарылды. Қазір ғалымдар 151 өлексені анықтады. Олардың сөзінше, өлген итбалықтардың кейбірінің денесінде механикалық зақым бар. Итбалықтардың жаппай қырылуына не себеп болғаны әлі белгісіз", – деп жазды блогер Азамат Сәрсенбаев Instagram парақшасында.
Ауыл шаруашылығы министрлігінің мәліметінше, тиісті зертханалық зерттеулерден кейін ғана итбалықтардың өлімінің себептері белгілі болады. Оқиға орнына инспекцияның, жергілікті атқарушы органның, гидробиология және экология институтының, Qazaq balyk республикалық балық шаруашылығы және аквамәдениет қауымдастығы филиалының өкілдері жедел түрде аттанған.
Айта кету керек, Каспий итбалығы Қызыл кітапқа енгізілген. 2006 жылдан бері итбалық аулауға тыйым салынған.
