/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 379,41 Brent 36,55
Қасым-Жомарт Тоқаев бірқатар мемлекеттің елшілерінен сенім грамоталарын қабылдады

Қасым-Жомарт Тоқаев бірқатар мемлекеттің елшілерінен сенім грамоталарын қабылдады

Қасым-Жомарт Тоқаев елшілерді Қазақстандағы дипломатиялық жұмыстарының басталуымен құттықтап, оларға табыс тіледі. 

01 Шілде 2020 15:41 99

Қасым-Жомарт Тоқаев бірқатар мемлекеттің елшілерінен сенім грамоталарын қабылдады

Фото: akorda.kz

Ақорда резиденциясында бірқатар мемлекеттің жаңадан тағайындалған төтенше және өкілетті елшілерінің Қазақстан Президентіне сенім грамоталарын салтанатты түрде тапсыру рәсімі өтті, деп хабарлады Ақорданың баспасөз қызметі. 

Мемлекет басшысына Бразилия Федеративтік Республикасының елшісі Рубем Антонио Корреа Барбоза, Оман Сұлтанатының елшісі Мұхаммед бен Абдулла бен Салих Әл-Бахрани, Корея Республикасының елшісі Ку Хонг-сок сенім грамоталарын тапсырды. 

Қасым-Жомарт Тоқаев елшілерді Қазақстандағы дипломатиялық жұмыстарының басталуымен құттықтап, оларға табыс тіледі. 

«Сіздердің елдеріңізбен арадағы қарым-қатынасымыз жоғары деңгейде. Осы мүмкіндікті пайдалана отырып, сіздердің мемлекеттеріңіздің басшыларына сәлем жолдаймын. Елдеріміз арасындағы өзара ықпалдастықтың одан әрі дамуына үлес қосасыздар деп сенемін. Сіздер бүкіл әлем пандемиядан зардап шегіп жатқан қиын-қыстау уақытта біздің елімізге келдіңіздер. Қазақстан бұл қауіпті дертті жеңу үшін дер кезінде шешім қабылдап жатыр. Бұл оңай жұмыс емес. Бірақ біз халықаралық ынтымақтастыққа арқа сүйейміз, БҰҰ-ның іс-әрекеттерін қолдаймыз. Сонымен қатар әлемдегі барлық ел күш біріктіре отырып, аталған дертті жеңеді деп үміттенеміз», – деді Президент.

Қазақстан мен Израиль арасында визаны алып тастау мәселесі талқыланды

Қазақстан Елшісі Сатыбалды Бұршақов Израиль Мемлекеті Ішкі істер министрлігінің халық және көші-қон істері жөніндегі басқармасының бас директоры Шломо Мор-Йосефпен және Сыртқы істер министрлігінің консулдық қызмет басшысы Стелла Раппен кездесті.

24 Қараша 2019 17:42 521

Қазақстан мен Израиль арасында визаны алып тастау мәселесі талқыланды

Қазақстан Елшісі Сатыбалды Бұршақов Израиль Мемлекеті Ішкі істер министрлігінің халық және көші-қон істері жөніндегі басқармасының бас директоры Шломо Мор-Йосефпен және Сыртқы істер министрлігінің консулдық қызмет басшысы Стелла Раппен кездесті, деп хабарлайды ҚазАқпарат.

ҚР Сыртқы істер министрлігінен мәлім еткендей, тараптар Қазақстан Республикасы мен Израиль Мемлекеті арасында визасыз келісімге қол қою келешегінің мәселелерін талқылады.

«Келіссөздердің қорытындысы бойынша екі ел сарапшылары дайындаған Ұлттық паспорттардың иелерін визалық талаптардан босату туралы келісімнің жобасын талқылап, бекіту мақсатында консультациялар жалғастыру жөнінде уағдаластыққа қол жеткізілді.

Еске салсақ, 2017 жылдың 1 қаңтардан бастап Қазақстан біржақты тәртіпте Экономикалық ынтымақтастық даму ұйымына мүше мемлекеттердің, соның ішінде Израиль азаматтары үшін визаларды алып тастады. Визаларды алып тастау туристік ағынның артуына септігін тигізді», - делінген СІМ мәліметінде.

Президент елшілердің сенім грамоталарын қабылдады

Мемлекет басшысы елшілерді Қазақстандағы дипломатиялық қызметтерінің ресми түрде басталуымен құттықтап, игі миссияларына табыс тіледі.  

11 Қараша 2019 20:23 268

Президент  елшілердің сенім грамоталарын қабылдады

Қазақстан Президенті Қасым-Жомарт Тоқаев бірқатар мемлекеттің елшілерінен сенім грамоталарын қабылдады, деп хабарлайды Ақорда.

Қасым-Жомарт Тоқаевқа Нидерланд Корольдігінің елшісі Андрей Карстенс, Мажарстан елшісі Антал Хейзер, Грекия Республикасының елшісі Адам Георгиос Адамидис, Египет Араб Республикасының елшісі Манал Ехия Әл Шиннауи, Катар Мемлекетінің елшісі Абдулазиз бен Сұлтан Джасем Маджид Әл-Румейхи сенім грамоталарын тапсырды.

Салтанатты шара барысында Президент шетелдік дипломаттармен шағын сұхбат құрды.

Қасым-Жомарт Тоқаев Нидерланд елшісіне аталған мемлекет Қазақстанның Еуропадағы негізгі серіктестерінің бірі екенін айтты.

«Біздің еліміздің «Шелл» және тағы да басқа ірі мұнай компанияларымен қарым-қатынасы өте жақсы. Мұндай ынтымақтастық алдағы уақытта да жалғаса береді деп ойлаймын. Біз Нидерландының Қазақстанмен тығыз ықпалдастық орнатуға ұмтылысын жоғары бағалаймыз. Сіздің еліңіздің инвестициялық әлеуеті орасан зор», – деді Мемлекет басшысы.

Қасым-Жомарт Тоқаев Антал Хейзермен кездесу барысында Қазақстанның Мажарстанды Орталық Еуропадағы және Еуропалық одақ аясындағы негізгі әрі маңызды серіктесі ретінде қарастыратынын атап өтті. Президент Мажарстан Үкіметінің Будапештте Түркі Кеңесінің офисін ашу жөніндегі шешімін құптап, оған тарихи әділеттіліктің орнауы деп баға берді.

«Екі ел арасында гуманитарлық байланыстар нығайып келеді. Ал экономика саласы бойынша даму қарқыны өте жоғары. Біздің үкіметтеріміз бірге жұмыс атқаруға ерекше құлшыныс білдіріп отыр», – деді Қазақстан Президенті.

Қасым-Жомарт Тоқаев Адам Георгиос Адамидиспен әңгімелесу кезінде Қазақстанның Грекиямен арадағы ынтымақтастықты дамытуға зор мән беретінін айтты.

«Біз Грекиямен осыған дейін қалыптасқан ынтымақтастықты одан әрі өркендетуге зор қызығушылық танытамыз. Сіз елші ретінде екі ел арасындағы байланысты әрі қарай дамытуға елеулі үлес қосасыз деп ойлаймын», – деді Президент.

Египет дипломатиялық миссиясының жетекшісін қабылдау сәтінде Мемлекет басшысы Президент Абдель Фаттах ас-Сисидің 2016 жылғы Қазақстанға жасаған сапары табысты болғанын атап өтіп, оған ізгі тілегін жолдады.

«Елдеріміз екіжақты қатынастарды дамыту бағытында оң нәтижелерге қол жеткізді. Халықаралық күн тәртібіндегі көптеген мәселе бойынша мемлекеттеріміздің ұстанымы ортақ», – деді Қасым-Жомарт Тоқаев.

Мемлекет басшысы Катар елшісіне 2019 жылдың маусым айында Душанбеде өткен Азиядағы өзара ықпалдастық және сенім шаралары жөніндегі кеңес саммиті аясында Әмір Тамим бен Хамад Әл-Танимен табысты кездесу өткізгенін айтты. Сондай-ақ аталған елмен ынтымақтастықтың нығая беретініне сенім білдірді.

«Біз Qatar Airways компаниясының Нұр-Сұлтан мен Доха арасында әуе қатынастарын іске қосу жөніндегі шешімін құптаймыз. Мемлекет басшысы ретінде өзім және Қазақстан Үкіметі Катармен байланыстарды нығайту үшін барлық қажетті шараларды қабылдаймыз», – деді Қасым-Жомарт Тоқаев.