"Биыл жоғары деңгейдегі көптеген екіжақты іс-шара жоспарланған. Оның ішінде негізгісінің бірі – Қазақстан Президенті Қасым-Жомарт Тоқаевтың 2022 жылғы мамырда Қырғызстанға сапары болып саналады. Бұл сапар екіжақты ынтымақтастықты дамытуға қосымша серпін беретініне сенімдімін", – деді Талант Мамытов Сенат төрағасы Мәулен Әшімбаевпен кездесу барысында.
Қырғызстан парламенті баспасөз қызметінің мәліметінше, Жогорку Кенештің спикері Алматыда ТМД-ға қатысушы мемлекеттердің парламентаралық ассамблеясының (ТМД ПАА) 30 жылдық мерейтойлық отырысы аясында қазақстандық әріптесімен кездескен.
Кездесу барысында қос ел арасындағы саяси-экономикалық және мәдени-гуманитарлық қатынастарды дамыту, парламентаралық ынтымақтастықты кеңейту мәселелері талқыланды.
Талант Мамытовтың айтуынша, Қырғызстан мен Қазақстан арасындағы тауар айналымының көлемі былтыр 1 млрд долларға жеткен, өзара саудадағы өсім – шамамен 35%.
