Қазақстан Республикасының Президенті Қасым-Жомарт Тоқаев сайлауалды пікірсайысқа қатыспайды, деп мәлімдеді мемлекет басшысының кеңесшісі Ерлан Карин.
"Президент сайлау рәсімі басталған кезде-ақ үгіт-насихат жұмысына өзінің қатысуын барынша шектеген болатын. Барлық үгіт-насихат жұмыстарын қазіргі Президенттің қоғамдық штабы мен сенімді өкілдері атқарады", – деді мемлекет басшысының кеңесшісі.
Сонымен қатар ол Президенттің басқа үміткерлер БАҚ-қа тең қол жеткізіп қана қоймай, сайлау мүмкіндіктеріне барынша ие болуға тиіс деп есептейтінін айтты.
Ерлан Кариннің айтуынша, Қасым-Жомарт Тоқаев жаппай үлкен бұқаралық шараларға қатысудан бас тартқан, бірақ өзінің қоғамдық штабына дебатқа қатысуға тапсырма берген.
Еске салар болсақ, Қазақстан президенттігіне үміткерлердің пікірсайысы 29 мамыр күні сағат 18:00-де "Хабар" телеарнасында тікелей эфирде болады.
