Қазақстандық ғалымдар әзірлеген қатерлі ісікке қарсы препарат сынақтың екі бастапқы кезеңінен сәтті өтті, деп хабарлайды Inbusiness.kz сайты Үкіметтің баспасөз қызметіне сілтеме жасап.
Ақпаратқа сәйкес, ҚР Ұлттық Ғылым академиясының вице-президенті, NU биология профессоры Дос Сарбасов қатерлі ісікке қарсы препаратты әзірлеу барысы туралы айтты. Дәрі-дәрмекті бірінші рет қабылдағаннан кейін он бес онкологиялық науқастың жағдайы тұрақталып, олардың алтауында ісіктің өсуі тоқтады, ал біреуінде бұл тіпті 30%-ға азайды. Қазір дәрігерлер препаратта уыттылықтың жоғы расталғаннан кейін оның дозасын арттырды.
"Біз қатерлі ісікке қарсы аппаратты 2022-2023 жылдары сынай бастадық, рұқсат құжаттарын алдық. Клиникалық сынақтың 1-ші және 2-ші кезеңдерін өткіздік. Қазір біз жоғары дозаны алуға қол жеткіздік. Сынақтар Қазақ онкология және радиология институтында өтіп жатыр. Біз глюкозаны сіңіретін рак клеткаларын жоямыз. Халықаралық патентіміз бар. Бақылау тобында болған 5 пациенттің жағдайын тұрақтандыруға әсер етті", – деді Дос Сарбасов.
Ғалымның айтуынша, 2-3 жыл ішінде жобаны аяқтау жоспарланып отыр.
Айта кету керек, осы жылдың басында Ғылым және жоғары білім министрі Саясат Нұрбек елімізде шығарылған қатерлі ісікке қарсы дәрі-дәрмекті таныстырғанын жазғанбыз. Ведомство басшысы Алматыдағы Қазақ онкология және радиология ғылыми-зерттеу институтында 15 адам емделіп жатқанын айтты.
