Елордада ет өнімдерін заңсыз сатумен айналысқан екі кәсіпорын анықталды. Астанада етті өңдеу рұқсат құжаттарынсыз және антисанитарлық жағдайларда жүргізілген, деп хабарлайды inbusiness.kz сайты.
"Полиция қызметкерлері мен ДКНБ қызметкерлері рұқсат құжаттарысыз және антисанитарлық жағдайда ет өңдеумен айналысқан заңсыз әрекетті тоқтатты. Кәсіпкер астыртын мал сою цехы үшін нысанды жалға алғаны анықталды. Онда алты адам заңсыз жұмыс істеп, күнделікті ақшалай төлем алып отырған. Қолданылатын шикізат ретінде құжатсыз сатып алынған күмәнді ет пайдаланылған. Дайын өнім Қазақстан өңірлеріне таратылған", - деп хабарлады Астана ПД өкілдері.
Құқық қорғаушылар Астананың бір ауданында жергілікті тұрғынның өз үйінің ауласында етті заңсыз сатумен айналысқан екінші оқиғаны да атап өтті. Өнімнің ешқандай құжаты, ветеринарлық мөрі болмаған.
"Қазір тәркіленген еттің сапасын тексеру үшін сараптама тағайындалды. Анықталған заңбұзушылықтар бойынша қылмыстық іс қозғалды. Құқықбұзушыларға қатысты әкімшілік хаттамалар толтырылған. Астана Полиция департаменті ет өнімдері ветеринарлық бақылаусыз адам денсаулығына қауіпті болуы мүмкін екенін ескертеді", - деп қосты полиция.
