"ҚазАгро" холдингі" АҚ басқарма төрағасы Рүстем Жомартұлы Құрмановтың басқа жұмысқа ауысуына байланысты, оның өкілеттігі мерзімінен бұрын тоқтатылды, деп хабарлайды компанияның баспасөз қызметі.
Басқарма төрағасының міндетін уақытша атқару Елнар Расилханұлы Жолдасовқа жүктелді.
Жолдасов Елнар Расилханұлы – 1979 жылы туған, Оңтүстік Қазақстан облысының тумасы. Әл-Фараби атындағы Қазақ мемлекеттік ұлттық университетін "Құқықтану" мамандығы бойынша, сондай-ақ Бөкетов атындағы Қарағанды Мемлекеттік Университетін "Қаржы және несие" мамандығы бойынша бітірген.
Еңбек жолын 2001 жылы бастаған, 2001-2018 жылдар аралығында Қазақстан Республикасының екінші деңгейдегі банктерінде, оның ішінде басшылық лауазымдарда жұмыс істеген.
14.02.2018 – 14.03.2018 жж. "ҚазАгро" холдингі" АҚ тәуелсіз директоры, "ҚазАгро" холдингі" АҚ директорлар кеңесінің ішкі аудит және тәуекелдер жөніндегі комитетінің төрағасы болды.
2018 жылғы 15 наурыздан бастап "ҚазАгро" холдингі" АҚ-ның қаржы жөніндегі басқарушы директоры - басқарма мүшесі қызметін атқарды.
