Қазақстан халықаралық экономикалық бәсекеге қабілеттілік рейтингінде 38-орынға орналасты. Ел 65,4 балл жинаған, деп хабарлайды inbusiness.kz сайты.
Зерттеуде әлемнің 70 мемлекеті экономикалық ахуалы, мемлекеттік басқару сапасы, бизнес тиімділігі және инфрақұрылымы бойынша сараланған.
Қазақстанның жекелеген бағыттардағы нәтижесі мынадай:
экономикалық көрсеткіштер – 57-орын;
мемлекеттік басқару тиімділігі – 23-орын;
бизнес тиімділігі – 23-орын;
инфрақұрылым – 43-орын;
жалпы ішкі өнім көлемі – 44-орын.
Былтыр Қазақстан бұл рейтингте 34-орында болса, 2022 жылы 43-сатыдан көрінген.
ТМД елдерінің ішінде Қазақстан аталған рейтингке енген жалғыз мемлекет болды. Жаһандық тізімде ел Испания, Португалия, Польша, Италия және Аргентинадан жоғары тұр.
Рейтингтің көшін Сингапур бастады. Алғашқы ондыққа сондай-ақ Гонконг, Швейцария, Тайвань, Біріккен Араб Әмірліктері, Дания, Ирландия, Нидерланд, Швеция және АҚШ кірді.
Зерттеу дерегіне сәйкес, Қазақстан халқының саны 20,4 миллион адамға жетіп, бұл көрсеткіш бойынша 32-орынға жайғасқан. Жұмыссыздық деңгейі 4,6% болып, ел 31-орында тұр. Ал инфляция 11,4% деңгейінде тіркеліп, Қазақстан осы көрсеткіш бойынша 65-сатыға орналасты.
Айта кетейік, бұған дейін S&P Global Ratings Қазақстанның тәуелсіз кредиттік рейтингін "BBB" деңгейіне дейін көтерген еді. Бұл – елдің 2016 жылдан бергі ең жоғары көрсеткіші. Агенттік мұндай шешімге Қазақстан экономикасының тұрақтылығы, инвестициялық әлеуеті және қаржылық қорларының жеткіліктілігі әсер еткенін атап өткен.
