Қазақстан әскери-теңіз күштерінің кемелері "Теңіз кубогі – 2017" халықаралық байқауына қатысу үшін Әзербайжанға жетті, деп хабарлайды mod.gov.kz.
Қазақстан әскери-теңіз күштері кемелерінің Әзербайжан Республикасы әскери-теңіз күштері шоғырланған Пута портына кіруі әскери-теңіз дәстүрлеріне сай салтанатты жағдайда жүзеге асты.
"Сарыарқа" зымыранды-артиллериялық кемесі мен "Қазақстан" қосалқы зымыранды-артиллериялық кемесі "АрХО – 2017" шеңберінде Әзербайжан Республикасының аумағында өтетін "Теңіз кубогы – 2017" халықаралық байқауына қатысу үшін сол елдің теңіз айлағына барды. Қазіргі уақытта байқау өтетін орындарда қатысушы елдердің суүсті кемелерінің экипаждары арасында тікелей дайындықтар басталып кетті. Бұл байқауларға Әзербайжан Республикасының, Қазақстан Республикасының, Ресей Федерациясының және Иран Ислам Республикасының әскери қызметшілері қатысады. "Теңіз кубогы – 2017" байқауы ағымдағы жылғы 1-11 тамыз аралығында өтеді.
