Economist Impact зерттеу орталығы жүргізген зерттеу барысында 113 елдің азық-түлік қауіпсіздігіне мән берілген, деп жазады inbusiness.kz тілшісі орталық жасаған зерттеу нәтижесіне сілтеме жасап.
Индекс негізгі 4 мәнге сүйенеді: азық-түлік бағасының тиімділігі, азық-түліктің болуы, сапасы мен қауіпсіздігі және тұрақтылық пен бейімделу көрсеткіштері.
Орталық сарапшыларының дерегінше, әлемдік азық-түлік жүйесі COVID-19 пандемиясынан, геосаяси ахуалдан туындаған шикізат бағасының қымбаттауынан жыл сайын әлсіреп бара жатыр. Зерттеушілердің мәліметі бойынша қазіргі таңда әлем 15 жыл ішінде азық-түлік бағасына қатысты үшінші дағдарысқа тап болып отыр. 2008 жылғы азық-түлік бағасының шарықтай қымбаттауы секілді жағдайдың қайталанбауы үшін тиісті шараларды атқаруда.
"Алайда, климаттың өзгеруі, кедейшіліктің кең етек алуы және қақтығыстар бірлесіп ғаламдық азық-түлік қауіпсіздігіне зор қауіп төндіріп отыр. Тұрақты азық-түлік жүйесі жөніндегі Халықаралық сарапшылар тобы "егер бұл қауіпті тоқтатындай шаралар қолданылмаса азық-түлік бағасының көтерілуі жаңа нормаға айналуы мүмкін", - деп есептейді.
Азық-түлік қауіпсіздігінің 11-ғаламдық индексінде Қазақстан 32 орынды иеленді. Индекс 72,1 баллды құрады. Дегенмен, азық-түліктің орташа бағасы бойынша Қазақстан 113 елдің ішінде 97 орында, ал азық-түлікке қол жеткізу мүмкіндігі жөнінен 49 орынға төмендеген.
Бұл индексте бірінші орында Финляндия, Ресей 43-орында, Өзекстан - 73, Тәжікстан 75-орынға тұрақтапты.
