Осыдан 6 жыл бұрын ұйымдастырылған шаруашылықтардағы ірі қараның саны 35,1% -дан 44,9%-ға өсті. Ал соңғы 5 жылда ел аумағындағы ірі қараның басы 23,3%-ға көбейді.
Мәжілістегі үкімет сағатында ауыл шаруашылығы министрі Сапархан Омаров мәлімдегендей, былтыр ет өндіру көлемі 5,8%-ға ұлғайып, 1,1 млн тоннаны құрады.
"Ет өндірісінің артуына етті мал шаруашылығының қарқын алуы, оның ішінде ірі қара мал санының өсуі әсер етті. Соңғы 5 жылда ірі қара мал басы 23,3%-ға өсіп, 7,4 млн басты құрады. Ал ұсақ мал саны 6,623,3%-ға өсіп, 19,1 млн, жылқы 45,8%-ға көбейіп, 2,8 млн басқа жетті", – деді министр.
Оның сөзінше, қазір елді етпен қамтамасыз ету үлесі 85%-ды құрап отыр.
Сиырдың, қойдың, жылқының және шошқаның қызыл еті бойынша импорт үлесі жалпы тұтыну көлемінің 5%-нан аспайды.
"Өңдеуге тек мұздатылған ет әкелінеді. Құс еті бұған кірмейді. Құс еті бойынша ішкі тұтынудағы импорт үлесі 44,7%-ды құрайды. Атап айтқанда, БҰҰ-ның азық-түлік және ауыл шаруашылығы ұйымы классификациясы бойынша тұтыным 80% отандық өндіріс есебінен қамтылған жағдайда ғана азық-түлік қауіпсіздігі қамтамасыз етіледі", – деді Сапархан Омаров.
Қанат Махамбет
