Қазақстан Республикасының Бас прокуроры Берік Асылов қылмысқа қарсы іс-қимыл саласындағы халықаралық ынтымақтастықты нығайту мақсатында Гонконгқа жұмыс сапарымен барды, деп хабарлайды inbusiness.kz сайты.
Сапар аясында Бас прокурор Гонконгтың Қауіпсіздік жөніндегі хатшысы Крис Тангпен кездесті. Тараптар құқық қорғау органдарының өзара іс-қимылын күшейту, трансұлттық қылмыспен күрес және іздеудегі тұлғаларды ұстап беру мәселелерін талқылады.
Сондай-ақ заңсыз шығарылған активтерді қайтару және қылмыстық жолмен алынған кірістерді жылыстатуға қарсы іс-қимыл бағытындағы ынтымақтастыққа ерекше назар аударылды.
Кездесу қорытындысы бойынша үш мемлекетаралық келісімге қол қойылды: жасырынып жүрген қылмыскерлерді ұстап беру, қылмыстық істер бойынша өзара құқықтық көмек көрсету және сотталған адамдарды беру туралы құжаттар.
Тараптар жедел ақпарат алмасу мен заманауи технологияларды, соның ішінде жасанды интеллектіні қолдана отырып қылмыстарды тергеу тәжірибесін дамытуға уағдаласты.
Қазақстан Бас прокуратурасы бұған дейін Макао және Сингапурмен де осындай халықаралық келісімдер жасаған.
