Синоптиктер ел аумағындағы синоптикалық жағдай мен ауа райының қауіпті құбылыстары бойынша болжам ұсынды. Онда келесі мәліметтер келтірілген:
"Атмосфералық фронттардың әсерінен ауа райы тұрақсыз болады. Елдің солтүстігінде, шығысында, оңтүстік-шығысында жаңбыр, найзағай, ал шығысында – қатты жаңбыр жауып, күндіз бұршақ түсуі мүмкін. Қалған өңірлерде антициклон ықпалымен жауын-шашынсыз ауа райы күтіледі", – делінген "Қазгидрометтің" ақпаратында.
Сондай-ақ республика бойынша жел күшейеді, шығыста дауыл болуы ықтимал.
Сонымен қатар Маңғыстау, Атырау, Алматы облысының оңтүстігі мен шығысында, Шығыс Қазақстан облысының оңтүстігі мен орталығында, Ақтөбе облысының оңтүстігі мен оңтүстік-шығысында, Ұлытау облысының орталығында жоғары өрт қаупі сақталады.
"Жамбыл, Қызылорда, Түркістан, Жетісу облыстарында, Алматы облысының солтүстігі, батысы және орталығында, Қарағанды облысының батысы, оңтүстігі мен шығысында, Ұлытау облысында, Ақтөбе облысының орталығында, Маңғыстау облысының солтүстік-батысында, Қостанай облысының оңтүстік-батысында, Абай облысының оңтүстігінде төтенше өрт қаупі күтіледі", – деп толықтырды синоптиктер.
Күндіз Атырау және Алматы облыстарында аптап ыстық болады – ауа температурасы +35°С дейін көтеріледі. Түркістан облысының батысында +40°С, ал Жетісу облысының шығысы мен солтүстігінде +35…+37°С күтіледі.
