ҚР Цифрлық даму, инновациялар және аэроғарыш өнеркәсібі министрі Бағдат Мусин Сауд арабиясының Төтенше және Өкілетті елшісі Фесал бен Ханиф Аль Кахтанимен кездесті, деп хабарлайды Inbusiness.kz сайты.
Кездесуде ЦДИАӨ министрі Бағдат Мусин цифрландыру саласындағы жаңалықтармен және осы саладағы болашақ жоспарларымен бөлісті.
"Бүгін біз технология мен жасанды интеллект біздің өмірімізде шешуші рөл атқаратын жаңа дәуірдің қарсаңында тұрмыз. Біз қазірдің өзінде қызметтерді 100% цифрландыруға келе жатырмыз. Қазақстанның жаһандық мақсаты – аймақтағы ең ірі Цифрлық хабтардың біріне айналу", - деді Бағдат Мусин.
Бүгінде Қазақстан әлемдік аренада 193 елдің арасында лайықты орынға ие, электронды үкіметтің даму деңгейі бойынша 28 орында, киберқауіпсіздік бойынша – 31 орында, азаматтардың электронды қатысу рейтингісінде Қазақстан 15-орынға ие болды, бұл әлемдегі ең күшті көрсеткіштердің бірі.
Атап айтқанда, Сауд Арабиясы Корольдігі 2022 жылы электронды үкіметтің дамуы бойынша елдер рейтингінде 31-ші орынды иеленді. Ол онлайн қызмет көрсету индексі бойынша 32-орында, телекоммуникация инфрақұрылымы бойынша 28-ші орында, адам капиталы бойынша 48-ші орынды иеленді.
Digital Intelligence Index рейтингінде Қазақстан цифрландырудың даму жылдамдығы бойынша 20 орынға ие болды және цифрлық әл-ауқаттың одан әрі дамуы бойынша ең перспективалы елдердің тобына енді.
