Қазақстан құрамасы Түркияның Ыстамбұл қаласында өткен IGeO-2026 халықаралық география олимпиадасында жоғары нәтиже көрсетті. Ұлттық құрама екі алтын және екі күміс медаль жеңіп алып, жалпы командалық есепте екінші орынға тұрақтады.
Қостанайдағы физика-математикалық бағыттағы NIS-тің 11-сынып оқушысы Андрей Енбахтов алтын медальмен қатар, жеке есепте абсолютті чемпион атанды. Ол бұл жетістігін екінші жыл қатарынан қайталап отыр.
Жетісу облысындағы Мұхтар Арын атындағы №24 мамандандырылған лицейдің 10-сынып оқушысы Бекбол Дарын да алтын медаль иеленіп, жеке есепте тоғызыншы орынға шықты.
Ал Шығыс Қазақстан облысындағы дарынды балаларға арналған "Білім-инновация" лицей-интернатының оқушылары Амир Дарынов пен Алан Козленко күміс медальға қол жеткізді. Осылайша, Қазақстанның төрт спортшысы да олимпиада жүлдегері атанды.
Биылғы халықаралық дода 11-17 тамыз аралығында Ыстамбұлда ұйымдастырылып, оған 50 елден 184 оқушы қатысты.
Қазақстан IGeO олимпиадасына 2012 жылдан бері қатысып келеді. Осы кезеңде отандық оқушылар 7 алтын, 6 күміс және 7 қола медаль жеңіп алған.
Жалпы, өткен оқу жылында қазақстандық оқушылар халықаралық олимпиадалардан 1 059 медаль еншіледі.
