Отандық кәсіпкерлер мен тұрғындар "Қазақстан халқына" қорына 12 млрд-тан аса теңге аударды, деп хабарлайды inbusiness.kz порталы аталған қордың баспасөз қызметіне сілтеме жасап.
Аударылған қаржының 10 млрд теңгесі kaspi bank-ке тиесілі.
"Заңды тұлғалардан қорға 12,36 млрд теңге түсті. "Қазақстан халқына" қоры арқылы қайырымдылыққа kaspi bank АҚ және оның құрылтайшылары Вячеслав Ким мен Михаил Ломтадзе – 10 млрд теңге, "Халық" қайырымдылық қоры" ЖҚ – 2 млрд теңге, "Степногорск тау-кен химиялық комбинаты" ЖШС – 350 млн теңге және басқа да заңды тұлғалар ақша аударды", – деп жазылған хабарламада.
2022 жылғы 17 қаңтардағы мәліметке сәйкес, 6,519 мың қазақстандық "Қазақстан халқы" қорына 10,1 млн теңге аударған.
Айта кетейік, қорға үкімет басшысы Әлихан Смайылов пен премьер-министр кеңсесінің қызметкерлері, Президенті әкімшілігі және басқа да мемлекеттік және жеке ұйымдар бір күндік жалақысын аударған болатын.
