Кейінгі 5 жылда Қазақстан ЕАЭО елдеріне көкөніс экспортының көлемін 4 есе, жемісті 2 есе, сүт өнімдерін 3 есе ұлғайтқан. Орталық коммуникациялар қызметінде өткен баспасөз мәслихатында Ауыл шаруашылығы вице-министрі Руслан Манатаев бұл жөнінде толығырақ айтып берді.
"Пандемияға байланысты экономикалық өсім қарқынының баяулағанына қарамастан, 2020 жылдың қорытындысы бойынша Қазақстанда ауыл шаруашылығы өнімдерін өндіру көлемі 5,6%-ға ұлғайды. Ал ЕАЭО елдері бойынша бұл көрсеткіш орташа есеппен 2,3%-ды құрады",– деді Руслан Манатаев.
2016 жылмен салыстырғанда былтыр Қазақстан АӨК өнімдерінің экспорты 1,5 еседен асып, $2,7 млрд-қа дейін жетті. Сондай-ақ, ол ауыл шаруашылығы өнімдерін ЕАЭО елдеріне жеткізу көлемі 5 жылда 26%-ға өскенін атап өтті.
"2016 жылдан бері Қазақстан ЕАЭО елдеріне көкөніс экспортының көлемін 4 есе (9,1 млн доллардан 35,7 млн АҚШ долларына дейін), жеміс-жидекті 2 есе (8,7-ден 16,2 млн АҚШ долл.), сүт өнімдерін 2,9 есе (2020 жылы 17,2-ден 49,5 млн АҚШ долл.) арттырды. Қазақстан ауыл шаруашылығы өнімдері сияқты терең өңделген өнім экспортының көлемін де едәуір ұлғайту әлеуетіне ие",– деп мәлімдеді спикер.
Вице-министрдің айтуынша, ауыл шаруашылығы өнімдерінің өндірісі мен экспортының өсімі ЕАЭО аясындағы мүмкіндіктерге негізделген.
Аян Бекенұлы
