Бокстан Қазақстан ұлттық құрамасы Гамбургте өтетін әлем чемпионатына жол тартты. 25 тамыз күні басталатын кіл мықты боксшылардың бәсекесі 2 қыркүйекке дейін жалғасады, деп хабарлайды vesti.kz.
Қазақ боксшылары 10 салмақ дәрежесі бойынша да бақ сынайды. Ұлттық құраманың бас жаттықтырушысы Мырзағали Айтжанов шәкірттерінен жоғары нәтиже күтеді.
"Дайындық жаттығулары жақсы өтті. Ешкім жарақат алған жоқ. Көп уақытта Алматының таулы аймағында жаттықтық. Астанада тактикалық тұрғыдан дайындалдық. Кімге қандай қарсылас жолығуы мүмкін екенін аздап білеміз. Кез келген боксшы өз салмағындағы боксшыларға қарсы тактикалық дайындығын шыңдады. Барлық боксшыларға жеке жаттықтырушылары көмектесті. Кейбірінің жаттықтырушылары Германияға да барады. Командада олардан бөлек, психолог, массаж жасаушы және дәрігер мамандар бар.
Енді қалғаны жігіттердің өздеріне байланысты болмақ. Сәттілік серік болғай. Боксшылар тас-түйін дайын. Соңына дейін тіресіп бағатын болады. Жеңісті ешкім жай бермейді. Оның үстіне көпшілігі әлем чемпионатына алғаш рет бара жатыр. Ералиев пен Левит – тәжірибелі. Абылайхан Жүсіпов те олимпиада ойындарына қатысқан тәжірибесі бар. Команда жанкүйерлерді қуанту үшін барын салатын болады", - деді Мырзағали Айтжанов.
