Қазақстан-Қытай тауар айналымы 15,4 млрд долларға жетті

1327

15 жылда Қытай елімізге 19,2 миллиард доллар инвестиция құйған.  

Қазақстан-Қытай тауар айналымы 15,4 млрд долларға жетті

2020 жылы Қазақстан мен Қытай арасындағы сауда айналымы 4%-ға өсіп, 15,4 миллиард доллар болған. Бұл туралы ҚР сауда және интеграция вице-министрі Қайрат Төребаев айтты, деп хабарлайды inbusiness.kz тілшісі министрліктің баспасөз қызметіне сілтеме жасап.

Оның айтуынша, "Нұрлы жол" және "Бір белдеу – бір жол" бағдарламалары қос мемлекеттің сауда-экономикалық байланысына серпін берген.

"2020 жылы Қытаймен тауар айналымы 4%-ға өсіп, 15,4 миллиард долларға жетті. Қытайға экспорт 9 миллиард доллар, импорт 6,4 миллиард доллар болды. Қытай Қазақстанға инвестиция салған ең ірі инвесторлардың бестігіне кіреді", - деді вице-министр "Қорғас" шекара маңы ынтымақтастығын дамытуға арналған жиында.

Қайрат Төребаев 2005-2020 жылдары аралығында елімізге тартылған Қытай инвестицияның жалпы көлемі 19,2 миллиард доллардан асқанын атап өтті.

"Қытайға тікелей инвестицияның жылыстауы (отток) $ 667,2 миллион доллар болды. Индустриялық-инвестициялық ынтымақтастық бағдарламасы аясында 24,5 миллиард долларға 56 кәсіпорын салу жоспарланып отыр. Нысандардың құрылысы 2023 жылға қарай аяқталады", - деді ол.

Оның айтуынша, бүгінде "Қорғас" ШЫХО-ның Қазақстан аумағында жалпы сомасы 110,37 миллиард теңгеге 29 инвестициялық жобаны жүзеге асыру бойынша 24 компания жұмыс істеп жатыр.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу