Қазақстан мен Армения қалдықтарды басқару жүйесін жетілдіру, электр көлігін дамыту және табиғи аумақтарға түсетін экологиялық жүктемені азайту мәселелерін талқылады, деп хабарлайды inbusiness.kz сайты.
Кездесу Ереван қаласында БҰҰ-ның Биологиялық әртүрлілік туралы конвенциясы Тараптарының 17-ші конференциясы (COP17) аясында өтті. Қазақстанның Экология және табиғи ресурстар министрі Әлібек Қуантыров Арменияның аумақтық басқару және инфрақұрылым министрі Давид Худатянмен кездесті.
Тараптар қалдықтарды бөлек жинау, сұрыптау және қайта өңдеу жүйесін дамыту, сондай-ақ осы салаға заманауи технологияларды енгізу мүмкіндіктерін қарастырды.
Сонымен қатар жаңартылатын энергия көздерін пайдалану, электр көліктерін дамыту және оларға арналған инфрақұрылымды кеңейту мәселелеріне назар аударылды.
Кездесуде ерекше қорғалатын табиғи аумақтарға көлік құралдарының әсерін азайту жолдары да талқыланды. Атап айтқанда, кейбір табиғи аумақтарға іштен жану қозғалтқышы бар автокөліктердің кіруін шектеу және келушілерге экологиялық таза балама көлік түрлерін ұсыну мүмкіндіктері қарастырылды.
Тараптардың пікірінше, мұндай шаралар атмосфераға таралатын зиянды заттарды азайтып, табиғи экожүйелерді қорғауға және экологиялық туризмді дамытуға ықпал етуі мүмкін.
Кездесу қорытындысы бойынша екі ел талқыланған бағыттарда тәжірибе алмасуды жалғастыруға мүдделілік білдірді.
