Қазақстанның Грекиядағы елшісі Тимур Сұлтанғожин Грекия Сыртқы істер министрлігінің Саяси мәселелер жөніндегі бас директоры Андреас Фриганаспен кездесті, деп хабарлайды inbusiness.kz сайты.
Афинада өткен кездесуде Қазақстан мен Грекия арасындағы қазіргі саяси байланыстар мен ынтымақтастықты одан әрі дамыту перспективалары талқыланды.
Тараптар саяси диалогты нығайтуға және екі ел арасындағы практикалық өзара іс-қимылды кеңейтуге басымдық берді. Сондай-ақ жоғары және жоғары деңгейдегі өзара сапарларды ұйымдастыру, Экономикалық және технологиялық ынтымақтастық жөніндегі үкіметаралық комиссияның кезекті отырысын өткізу мәселелері қаралды.
Бұдан бөлек, екіжақты шарттық-құқықтық базаны жетілдіру, сауда-экономикалық және инвестициялық байланыстарды дамыту перспективалары сөз болды.
Кездесуде халықаралық күн тәртібіндегі өзекті мәселелер бойынша да пікір алмасылды. Атап айтқанда, халықаралық кеме қатынасының қауіпсіздігі мен көлік-энергетикалық байланыстардың тұрақтылығына назар аударылды.
Кездесу соңында тараптар сындарлы диалогты жалғастырып, Қазақстан мен Грекия арасындағы өзара тиімді ынтымақтастықты одан әрі нығайтуға мүдделі екенін растады.
