Ұлы ақын Абай Құнанбаевтың туған күніне орай латын графикасымен алғаш рет қазақ-өзбек тілдерінде газет шығару жоспарланып отыр, деп хабарлайды ҚазАқпарат.
Бұл туралы Халықаралық Түркі академиясы мен ӨР Жазушылар одағының кездесуінде Қазақстан Республикасының Өзбекстандағы төтенше және өкілетті елшісі Ерік Өтембаев мәлім етті.
"Бүгін біз бірлескен кітап-журналдарды әзірлеу ісіне жақсы негіз болатын ынтымақтастықтың өзекті мәселелерін талқыладық. Латын графикасымен басылатын бірлескен газетті шығару жөнінде келісімге қол жеткізілді. Бұл мәселеде Өзбекстанның тәжірибесі, жақсы әдіснамалық негіздері бар. Латын графикасымен жаңа шығармаларды шығаруға болады. Бұл оқырмандарға Өзбекстан және Қазақстан өмірі туралы көбірек білу мүмкіндігін береді. Бұдан тыс, екі елдің жазушылар одағының ортақ тарихын сипаттайтын әрі шығармашылықпен айналысатын бүкіл зиялы қауымға арналған жол картасын жасау мәселесін қарадық. Біз екі халықтың болашағын көрсетуіміз қажет. Ондай жол картасы жаңа туындылардың өмірге келуіне түрткі болып, тамам халыққа қолжетімді болады. Үстіміздегі жылдың тамыз айында, ұлы ақын Абай Құнанбаевтың туған күніне орай алғашқы газетті шығаруды жоспарлап отырмыз. Сонымен қатар, ӨР президентінің қаулысымен жыл сайын "Абай оқулары" өткізілмек", - дейді Ерік Өтембаев.
