Өзбекстан Президенті Шавкат Мирзиёевтің Қазақстанға мемлекеттік сапары аясында жоғары мемлекетаралық кеңестің алғашқы отырысы өтті. Онда қабылданған шешімдердің стратегиялық маңызы өте зор. Бұл туралы Мемлекет басшысы Қасым-Жомарт Тоқаев айтты, деп хабарлайды inbusiness.kz сайты.
"Кеңес барысында қазақ-өзбек ынтымақтастығының өзекті мәселелері жөнінде пікір алмастық. Өзара серіктестікті нығайту түсудің тиімді жолдарын айқындадық. Нақты келісімдерге қол жеткіздік. Атап айтқанда, экономикалық байланыстарды күшейтуге келістік. Қазақстан мен Өзбекстан Орталық Азиядағы сауда-саттық бойынша ең ірі серіктестер. Былтыр өзара тауар айналымы 4,4 млрд долларға жетті. Біз бұл көрсеткішті таяу арада 5 млрд, кейін 10 млрд долларға дейін жеткізу мақсатын тағы да атап көрсеттік. Ол үшін алыс-берістегі тауар түрін көбейтуіміз керек. Сондай-ақ экономикалық ықпалдастықты тежейтін кедергілерді жою қажет. Жалпы сауда-саттықтың ауқымын кеңейтуге екі елдің де мүмкіндігі мол. Қазірдің өзінде Өзбекстанға шығаратын экспортты 550 млн долларға арттыра аламыз. Яғни өңделген тауардың тағы 40 түрі бойынша экспорт жасауға мүмкіндік бар", - деді Мемлекет басшысы.
Қасым-Жомарт Тоқаев өзбек елі де Қазақстанға көптеген өнім түрлерін жіберіп отырғанын баса айтты.
