Қазақстан мен Ресей шекарасында жаңа тасжол пайдалануға берілді. Бұл "Батыс Еуропа-Батыс Қытай" халықаралық магистралінің негізінде салынған Ақтөбе-Орынбор учаскесі. Ұзындығы 50 шақырым.
Автожолдың ресми ашылуына екі елдің аймақ басшылары - Бердібек Сапарбаев пен Юрий Берг қатысқан. Жалпы Ақтөбе-Орынбор бағытындағы тасжолда 25 жылдан бері бірлескен жөндеу жұмысы жүргізілмеген. Әсіресе, Ресей бөлігі әбден тозған. Дегенмен, жолдың жарамсыздығына қарамастан шекарадан тәулігіне 5 мың көлікке дейін қатынайды.
Ал Қазақстан жағынан Жайсаң бекетіне дейін бірер жыл бұрын реконструкция жасалыпты. Ресми ақпарға сәйкес, биыл екі облыс арасындағы сауда-саттық 3 есеге артқан. Әзірге тауар айналымы 171 млн долларды құрайды.
Аязбай Османғалиев, Ақтөбе облыстық жолаушылар көлігі және автомобиль жолдары басқармасының басшысы:
"Кәзір деген жақсы жол. Іске қосылды. Кәзір деген ойлаймын, товарооборотты тағы да ұлғайтады біздің Ақтөбе облысы мен Орынбор облысы арасында. Кәзір күніне бес мың машина жүріп жатса, ертең 7-10 мың машинаға дейін барады. Ол тауарды жақсы жеткізіп, халықаралық маңызды жол болып саналады".
