ҚР Көлік министрлігіне қарасты Азаматтық авиация комитеті ұшу географиясын кеңейту әрі тұрақты халықаралық рейстер санын ұлғайту шеңберінде жұмысты жалғастырып келеді. Бангкокта Қазақстан мен Таиландтың авиациялық билік органдары өкілдері арасында келіссөздер өтті.
Қазақстан Республикасы тарапынан барған делегацияны Азаматтық авиация комитеті төрағасының орынбасары Тимур Тілегенов, Таиланд Корольдігінің делегациясын жергілікті Азаматтық авиация басқармасы бас директорының орынбасары Сарун Бенджанират бастап барды.
Келіссөздер барысында екі тарап әуе қатынасы туралы жаңа үкіметаралық келісім жасасу мүмкіндігін және екі ел арасындағы әуе тасымалына сұраныстың артуына байланысты рейстер санын одан әрі ұлғайту мәселесін талқылады.
Келіссөздердің қорытындысы бойынша өзара түсіністік туралы меморандумға қол қойылды. Аталған меморандумға сәйкес рұқсат етілген рейстердің жалпы саны 35,4%-ға ұлғаяды (аптасына 402-ден 544-ке дейін). Атап айтқанда, Астана, Алматы, Қарағанды, Шымкент және Бангкок, Пухкет, Краби, Утапао қалалары арасында аптасына 84 рейс, ал қалған бағыттарда аптасына 10 рейске дейін.
Қазақстан мен Таиланд арасындағы рейстер санының артуы екі ел арасындағы туристік, мәдени, инвестициялық және іскерлік ынтымақтастықты дамытуды жеделдетуге мүмкіндік береді деп жоспарланып отыр.
Айта кетерлігі, Таиланд Корольдігінің Үкіметі биылғы 25 қыркүйектен бастап келесі жылдың 29 ақпанына дейін Қазақстан Республикасының азаматтары үшін уақытша визасыз режим енгізген болатын. Енді қазақстандықтар Таиландта 30 күнге дейін визасыз бола алады. Ұзақ сапарлар үшін сәйкесінше виза талап етіледі.
