Премьер-Министрі Асқар Мамин елімізге қазақстандық бизнес-форум мен Қазақстан – Венгрия стратегиялық кеңесінің V отырысына қатысуға келген Венгрия Премьер-министрінің орынбасары – Қаржы министрі Михай Варганы қабылдады, деп хабарлайды inbusiness.kz Үкімет басшысының сайтына сілтеме жасап.
Тараптар сауда-экономика, қаржы-банк, инвестиция, көлік-логистика, ауылшаруашылығы, АӨК, ТМК, жаңартылатын энергетика, фармацевтика, білім беру және басқа да салалардағы ынтымақтастықтың жай-күйі мен даму перспективаларын талқылады.
Үкімет басшысы екі елдің ұлттық экономикаларын қалпына келтірудің жоғары қарқыны жағдайында Қазақстанның Венгриямен сауда-экономикалық қатынастары мен инвестициялық ынтымақтастығының даму әлеуетін атап өтті.
Қазақстан-Венгрия бизнес-форумы аясында медициналық туризм, агроөнеркәсіптік кешен, жаңартылатын энергетика, көлік және логистика, қаржы салаларында бірлескен жобаларды іске асыру бойынша уағдаластықтарға қол жеткізілді.
Келіссөз барысында "Астана" халықаралық қаржы орталығы алаңындағы ынтымақтастық мәселелеріне ерекше назар аударылды. Қазіргі уақытта АХҚО-да Венгрияның "EXIM" банкінің өкілдігі жұмыс істейді, Венгрияның басқа да қаржы-банк құрылымдарымен өзара іс-қимылды кеңейту жоспарда бар.
Венгрия экономикасы – Орталық және Шығыс Еуропа аймағындағы ең дамыған экономикалардың бірі. 2020 жылы елдің ЖІӨ $155 млрд құрады. Еуропалық комиссия болжамы бойынша, 2020 жылы 5%-ға құлағаннан кейін, 2021 жылы экономика өсімі 6,3%-ды құрайды. Венгрия экономикасының жетекші салалары – машина жасау, АӨК, металлургия, құрылыс материалдарын өндіру, фармацевтика, азық-түлік өндірісі, көлік және логистика, жеңіл және химия өнеркәсібі.
Кездесуге Ұлттық Экономика министрі Әсет Ерғалиев, Қаржы министрі Ерұлан Жамаубаев, Индустрия және инфрақұрылымдық даму бірінші вице-министрі Қайырбек Өскенбаев, Сауда және интеграция вице-министрі Қайрат Төребаев және Қазақстанның Венгриядағы елшісі Жәнібек Әбдірашов қатысты.
