Қазақстан маусым айында ОПЕК+ аясындағы мұнай өндіру көлемін қысқату туралы келісімдегі өз міндеттемелерін 105% орындады, деп хабарлайды Интерфакс-Қазақстан Энергетика министрлігіне сілтеме жасап.
"Алдын ала деректер бойынша конденсатты есепке алмағанда маусым айында мұнай өндірісі 5,3 млн тоннаны немесе тәулігіне 1,297 млн баррелді құрады. ОПЕК+ келісімі аясында міндеттемелер маусым айында 105%-ға ооындалды", – деп жазылған хабарламада.
Еске сала кетсек, Қазақстан ОПЕК+ келісімі бойынша мамыр айында міндеттемелерін 71%-ға орындаған. Алайда бұл олқылықтың орнын еліміз тамыз, қыркүйек айларында толтырмақ. Ол үшін үкімет екінші жартыжылдыққа кен орындарна арнайы квоталар бөлген.
Жалпы еліміз аталған келісім аясында 2020 жылдың мамыр-шілде айларында мұнай өндірісін тәулігіне 390 мың баррельге төмендету жөнінде міндеттеме алған. Бұл ретте тәуліктік "қара алтын" өндірісі 1,319 млн баррельді құрайды.
