Елбасы Нұрсұлтан Назарбаевтың Өзбекстан Республикасына жоспарланған мемлекеттік сапары аясында тап қазір Ташкентте қазақ-өзбек бизнес форумы өтіп жатыр, деп хабарлайды 24.kz.
Бұл жиын екі елдің экономикалық қатынасына қарқын қосары анық. Қос мемлекеттің байланысы бұрыннан бекем екені баршаға аян. Стартегиялық серіктестер соңғы уақытта алыс-берісті барынша ұлғайтып келеді. Дәлірек айтсақ, жартыжылдықта көрші елдер тауар айналымын төрт есеге жоғарылатты.
Бүгін 70-ке жуық қазақстандық компания өнімдері көрмеге шығарылды. Атап айтсақ, көлік құрастыру, фармацевтика, құрылыс, IT саласының мүмкіндіктері кеңінен таныстырылды. Өзбекстанның іскер өкілдері Назарбаев университетінің білім-ғылым, медицинада қол жеткізген жетістіктерін де көре алады. Ұлттық компаниялардың жаңашылдықтары да жан-жақты насихаталып жатыр. Мамандар осы форум нәтижесі бойынша 800 миллион доллардың келісіміне қол жеткіземіз деп отыр.
